लग्नातील अवास्तव अपेक्षा, लग्न वय निघुन गेले तरी जुळत नाही आणि समाजाचे वास्तव.

*लग्नातील अवास्तव अपेक्षा, लग्न वय निघुन गेले तरी जुळत नाही आणि समाजाचे वास्तव* सुनिल पुणेTM 8007939422

आज आपल्या समाजात मुला-मुलींच्या लग्नाची एक गंभीर समस्या उभी ठाकली आहे. योग्य वयात नातं जुळून न येणं आणि जुळलं तरी टिकून न राहणं, या दोन्ही गोष्टींचं प्रमाण दिवसेंदिवस वाढताना दिसतं. त्यामागे अनेक कारणं आहेत, पालकांचा उशिरा होणारा विचार, नको त्या अपेक्षा, सासर-माहेर यांच्यातील विसंवाद आणि छोट्या-छोट्या कारणावरून होणारे वाद.

पालकांची सर्वात मोठी चूक म्हणजे वेळेवर जागं न होणं. मुलगा मोठ्या पगारावर पोहोचला की आता लग्न करायचं असं वाटतं. मुलगी उच्चशिक्षण पूर्ण करेपर्यंत वाट बघितली जाते. पण या दरम्यान वय निघून जातं आणि योग्य जोड्या मिळणं कठीण होतं. त्यातच रंग, उंची, पगार, घर, पद यासारख्या अवास्तव अपेक्षा जोडल्या जातात. परिणामी चांगल्या जोड्या फक्त अपेक्षांच्या बोजामुळे मोडतात.

यात वधू-वरांचाही दोष कमी नाही. आजची पिढी स्वतःच्या करिअर, सोशल मीडिया, मित्रपरिवार यामध्ये इतकी गुंतलेली आहे की लग्नानंतर जोडीदाराला वेळ, आदर आणि भावनिक आधार देणं विसरली आहे. छोट्या गोष्टींवरून वाद, जसं की Instagram किंवा WhatsApp वापरण्यावरून वाद निर्माण होतात. काही प्रकरणं कोर्टात जातात आणि लाखोंच्या मागण्या होतात. या सगळ्यामुळे विवाहसंस्था डळमळीत होतेय.

सासर-माहेरचं नातंही आज ताणलेलं दिसतं. सुनेच्या वागण्यात दोष शोधणं, जावयावर अवास्तव अपेक्षा लादणं किंवा उलट मुलीच्या माहेराकडचं पूर्णपणे नाकारलं जाणं हे सगळं घरात कटुता वाढवतं. पुरुष मंडळी नाकर्तेपणानं "हे बघून घे" म्हणून हात झटकतात आणि घरातला वाद आणखी खोलवर जातो. अशा वातावरणात पती-पत्नीचं नातं तुटणं ही फार आश्चर्याची बाब राहिलेली नाही.

पण उपायही आहेत. पालकांनी वेळेवर मुलांच्या लग्नाचा विचार करावा, अवास्तव अपेक्षा बाजूला ठेवाव्यात. वधू-वरांनी "माझं" नव्हे तर "आपलं" हा विचार स्वीकारावा, एकमेकांच्या आवडी-निवडींचा आदर करावा. सासर-माहेर यांनी एकमेकांना परके न मानता सहकार्याचा हात द्यावा. पैसा, प्रतिष्ठा, दिखावा यापेक्षा विश्वास, सहनशीलता आणि माणुसकी यांना प्राधान्य दिलं, तरच घर सुखी राहू शकतं.

लग्न ही केवळ दोन व्यक्तींची सोबत नसून दोन कुटुंबांचाही संगम आहे. या नात्याला टिकवण्यासाठी संवाद, समजूतदारपणा आणि परस्पर सहकार्य या गोष्टी आवश्यक आहेत. समाजाने वास्तव स्वीकारून एकमेकांना जोडण्याचा प्रयत्न केला, तरच विवाहसंस्था मजबूत होईल आणि पुढील पिढ्यांना आदर्श दाखवता येईल.

लेखक,

सुनील पुणे TM 9359850065 sunilpunetm.blogspot.com